نړیوالو بنسټونو د پاکستان هوايي بریدونه پر افغانستان سخت غندلي
د نړیوال بشري حقونو بنسټ (IHRF) د پاکستان وروستي هوايي بریدونه پر افغانستان سخت غندلي او دا یې د نړیوال بشري حقونو ښکاره سرغړونه بللې ده. دغه بنسټ ویلي چې د دې بریدونو په پایله کې ملکي وګړي په نښه شوي او درنه مرګژوبله رامنځته شوې ده.
په یوه اعلامیه کې چې لهخوا د دې بنسټ خپره شوې ده، د استوګنې کورونو بمبار کول او د ښځو او ماشومانو وژل “بېدلیله” ګڼل شوي او پر دې ټینګار شوی چې دا ډول بریدونه باید سمدستي ودرول شي. دغه بنسټ زیاته کړې چې د ملکي وګړو ساتنه د ټولو ښکېلو لورو قانوني او اخلاقي مسوولیت دی.
د نړیوال بشري حقونو بنسټ همداراز غوښتنه کړې چې په دې پېښه کې باید یو بېطرفه، روڼ او ژر نړیوال تحقیقات پیل شي او هغه کسان چې د دې بریدونو تر شا دي، حساب ورسره وشي. دغه بنسټ له نړیوالې ټولنې هم غوښتي چې د زیانمنو سیمو لپاره بېخنډه او عاجلې بشري مرستې برابرې کړي.
په همدې حال کې، د طالبانو د ننګرهار د امنیه قوماندانۍ ویاند سید طیب حماد ویلي چې په دې برید کې ۱۸ کسان وژل شوي دي. د ده په وینا، په قربانیانو کې ښځې او ماشومان هم شامل دي او پنځه تنه نور ټپیان شوي دي.
دغه پېښه په داسې حال کې رامنځته کېږي چې د پولو سیمو د اوسېدونکو د امنیت په اړه اندېښنې ډېرې شوې دي او له طالبانو تمه کېږي چې د ملکي وګړو د خوندیتوب او د دا ډول پېښو د تکرار د مخنیوي لپاره اغېزمن او ځواب ویونکی اقدامات وکړي.
